Guddiga Khayraadka Qaranka, Kaabayaasha Dhaqaalaha iyo Gaadiidka ee Aqalka Sare, ayaa maalintii saddexaad ku guda jira akhrinta, falanqaynta iyo turxaan-bixinta Hindise-Sharciyeedka Dhisidda Hay’adda Adeegga Saadaasha Hawada iyo Cimilada.
Xubnaha Guddiga ayaa kulankooda maanta ku qaabilay mas’uuliyiin ka socotay Wasaaradda Tamarta iyo Macdanta XFS, kuwaas oo Guddiga la wadaagay warbixin iyo talooyin ku saabsan Hindise-Sharciyeedka Dhisidda Hay’adda Adeegga Saadaasha Hawada iyo Cimilada, kaas oo ay soo diyaarisay Wasaaradd Deegaanka iyo Isbedelka Cimilada
Kulanka oo ay shir-guddoominaysay Guddoomiyaha Guddiga, Sanatar Saynab Ismaaciil Maxamed, ayaa uga mahadcelisay mas’uuliyiinta Wasaaradda Tamarta iyo Macdanta warbixinta iyo soo jeedimaha ay la wadaageen Guddiga, iyadoo carrabka ku adkaysay in Guddigu gudanayo waajibaadkiisa ku aaddan horumarinta iyo tayeynta shuruucda dalka, si loo helo sharci dhammaystiran oo tifaftiran, isla markaana ka tarjumaya baahiyaha dalka, kadib marka la soo dhammeystiro dhammaan la-tashiyada loo baahan yahay.
